المترو اسهل وسيلة مواصلات فى مصر
مش بكدب بجد والله اصل مقارنة بمواصلات مصر يبقا المترو نعيم
لا وايه من مميزات المترو انه لا يمكن يتاخر وميكونش فى محطته ف اى وقت
وكمان مكيف وبيسهل المرور لانه تحت الارض وده بيخليه سريع
وناااااااااادر جدا حوادث سيره
وكبير ويسع العديد من الافراد يعنى لا يمكن تقف فيه ودايما بتلاقى مكان تقعد
استنو عليا
لسه فى ميزه مش لاى حد ميزه للسيدات بس مخصص ليهم عربتان من القطار لهم وحدهم
وده شئ فى منتهى الاحترام لكون المراه وخصوصيتها
يا سلام على الاحلام حلوه مش كده
ننزل على ارض الواقع ونشوف بقا مميزات المترو المصرى
انه بيتاخر وده بيخلى الناس تتكدس على المحطه مما يؤدى لزحمه فى العربات
وكتير روحنا الامتحان متاخرين اعتمادا على البيه ( المترو ) وعلى انه مش ممكن منلقهوش وبنلاقى ان المستحيل ساعات بيتحقق وفعلا مش لاقيناه وانتظرنا لحد معاد الامتحان تقريبا وروحنا الامتحان بعد الوقت مبداء بنص ساعه !!!!
وان كان على التكيف بقا فالمترو المكان الوحيد اللى بحس فيه احساس السمك المدخن :(
كل ده كووووووم والتسول فى المترو كوم تانى
ورق بيتوزع مكتوب فيه كلام غريب كده وف الاخر الايه الكريمه اللى بتقول وفي أموالهم حق للسائل والمحروم
ساعتها بحمد ربنا ان الولد ده مش فاهم اللى ف الورقه والا كان طالب بحقه منى !!!
ومش هكلمكو يا ساده عن عربيات السيئات :(
اه هى اللى كنت بقول عنها احترام للخصوصيه دى
لالالالالا متفهموش ان انا اقصد اهانه لا سمح الله بس والله بشتكى انهم بيعاملونى وكانى اقل منهم مفيش واحده تستشعرت انى منهكه وفكرت تقوم وتقعدنى رغم انى بعملها كتير
بجد انا من البنات اللى بركب عربيات المخطلته بس مش تقولو لحد اصل هناك علشان الاختلاط بيقعدو ع الكرسى اربعه بس مش خمسه زى السيدات اللى بيشوفو ان المكان برح ويسيع م الحبايب الف
وكمان لسه رجالة مصر بخير وكتير بلاقى ناس تقف علشانى علشان رمضان بداء مش كتير اوى يعنى :)
اصل على رائ التوكتوك اللى بيعدى من تحت بيتنا واللى مكتوب عليه
الرجوله مالهاش قطع غيار :)
بجد انا بخرج من المترو اقول وياما فى المترو مظاليم :((
